Léttleikandi rokkarar með glænýja plötu

Fimmta plata bandarísku rokkaranna í The Strokes, Comedown Machine, kemur út í næstu viku á vegum RCA Records.

Hljómsveitin hefur á ferli sínum selt meira en fimm milljónir hljómplatna og bíða flestir rokkáhugamenn spenntir eftir hverri einustu útgáfu hennar.

Tvö ár eru liðin frá útkomu Angles, sem hlaut góðar viðtökur og þótti mun betur heppnuð en platan þar á undan, First Impressions of Earth, sem hafði komið út fimm árum áður.

Upptökurnar á Comedown Machine voru frábrugðnar síðustu plötu. Þá tók söngvarinn Julian Casablancas upp sitt efni sér á báti en í þetta sinn hittust þeir allir í hljóðverinu Electric Lady í New York. Það er ekki langt í burtu frá heimkynnum allra í bandinu, nema gítarleikarans Nicks Valensi sem býr í Los Angeles. Bæði tóku þeir upp eldri lög sem þeir áttu á lager sem og glæný lög og gengu upptökurnar vel fyrir sig.

The Strokes hefur lítið viljað fara í viðtöl í tengslum við plötuna og engin tónleikaferð virðist fyrirhuguð til að fylgja henni eftir. Líklegt má þó telja að sveitin spili á einhverjum tónleikahátíðum í sumar eins og hún gerði til að fylgja Angles eftir.

Comedown Machine hefur yfirhöfuð fengið góða dóma. Breska tímaritið Q gefur henni fjórar stjörnur af fimm mögulegum og segir hana bestu plötu sveitarinnar síðan hún náði fullkomnun með frumburði sínum Is This It sem kom út 2001. Vefsíðan Drowned in Sound er á sömu nótum og gefur henni átta af tíu í einkunn. Þar segir að The Strokes muni aldrei ná að fanga aftur hinn hráa og töfrandi töffaraskap á Is This It. Í staðinn sé Comedown Machine allt öðruvísi þar sem léttleikinn og gleðin séu í fyrirrúmi.

Bandaríska tímaritið Rolling Stone gefur Comedown Machine þrjár stjörnur af fimm og segir hana í raun sólóverkefni Casablancas og sýni hversu mikla virðingu hann beri fyrir tónlist níunda áratugarins. Gagnrýnandinn nefnir Lionel Ritchie, Aha, Howard Jones og sérstaklega Duran Duran sem áhrifavalda.

BBC gefur plötunni fína dóma og segir að þrátt fyrir að það taki lengri tíma að melta lögin en á síðustu plötum slái hljómsveitin aldrei feilnótu.