Balotelli bjargaði stigi í lokin

Mario Balotelli skoraði bæði mörk AC Milan þegar liðið gerði 2-2 jafntefli við Livorno á útivelli í ítölsku A-deildinni í fótbolta í kvöld. Balotelli skoraði jöfnunarmarkið sjö mínútum fyrir leikslok.

Þetta er í fyrsta sinn á tímabilinu þar sem Balotelli skorar tvö mörk í sama leik en hann var búinn að gera 4 mörk í fyrstu 10 leikjum sínum fyrir þennan leik.

AC Milan vann langþráðan sigur á Catania um síðustu helgi en tókst ekki að fylgja því eftir í kvöld. AC Milan hefur þar með aðeins náð að vinna einn af síðustu átta deildarleikjum sínum.

Mario Balotelli kom AC Milan í 1-0 á 7. mínútu eftir sendingu frá Kaka en Luca Siligardi (26. mínúta) og Paulinho (58. mínúta) snéru leiknum Livorno í vil áður en Balotelli skoraði jöfnunarmarkið á 83. mínútu.

AC Milan er í áttunda sæti deildarinnar, heilum 22 stigum á eftir toppliði Juventus. Livorno er átta sætum neðar.