Emil lék allan leikinn í sigri | Birkir kom ekkert við sögu

Emil Hallfreðsson lék allan leikinn fyrir Hellas Verona sem lagði Atalanta 2-1 að velli í ítölsku A-deildinni í fótbolta í dag. Birkir Bjarnason sat allan tíman á bekknum þegar Sampdoria lagði Catania 2-0.

Þrátt fyrir að skora í bikarnum í vikunni fékk Birkir ekki tækifæri með Sampdoria í dag en liðið vann mikilvægan sigur í fallbaráttunni.

Liðið lyfti sér úr fallsæti með sigrinum en liðið er í 16. sæti með 14 stig. Catania er á botni deildarinnar með 9 stig.

Emil Hallfreðsson var að vanda í lykilhlutverki hjá Hellas Verona. Liðið lenti í kröppum dansi því German Gustavo Denis kom Atalanta yfir á 42. mínútu.

Juan Gomez Taleb jafnaði metin á 82. mínútu og þremur mínútum fyrir leikslok tryggði Jorginho Hellas Verona sigurinn með marki úr vítaspyrnu.

Hellas Verona er í 6. sæti deildarinnar með 25 stig en Atalanta féll niður í 14. sæti deildarinnar með ósigrinum.