Halldór með hálskraga í stökkinu ótrúlega á Akureyri | Myndband

Snjóbrettakappinn Halldór Helgason sýndi mögnuð tilþrif á dögunum þegar hann stökk á milli húsa á Akureyri.

Nike er aðal styrktaraðili Halldórs en drengurinn hefur náð ótrúlegum árangri á sínum ferli á snjóbrettinu og er mjög vel þekktur í snjóbrettaheiminum.

Íþróttavöruframleiðandinn slóst í för með Halldóri fyrir norðan og var stökkið myndað í bak og fyrir.

„Ég hef verið að skoða möguleikann á þessu stökki í um þrjú ár,“ sagði Halldór Helgason, í viðtali við Nike.

„Mig hefur alltaf langað að reyna þetta stökk en var ekki viss um það hvort það væri mögulegt. Ég ákvað að lokum að láta loksins á það reyna, annars myndi ég aldrei gera það.“

Halldór meiddist illa þremur dögum fyrir stökkið og var mælt með því að hann myndi ekki fara á brettið í tvær vikur.

Hann fór ekki að ráðum læknisins var með hálskraga þegar hann sýndi þessi ótrúlegu tilþrif.

Hér má sjá myndband sem Nike gaf út á dögunum en í því er viðtal við Halldór og þetta magnaða stökk.