Sannfærandi hjá KR í Belfast

Öll þrjú íslensku liðin eru komin áfram í 2. umferð forkeppni Evrópudeildar UEFA. Það varð ljóst eftir öruggan 3-0 sigur KR á Glentoran í Belfast í kvöld.

Eftir markalausan fyrri leik í Frostaskjólinu var ljóst að KR-ingar þyrftu að sækja til sigurs í kvöld og það gerðu þeir. Gary Martin kom bikarmeisturunum á bragðið er hann vippaði boltanum yfir markvörð Glentoran í fyrri hálfleik.

Jónas Guðni Sævarsson skoraði svo bæði mörk KR í seinni hálfleik. Það fyrra á 65. mínútu með glæsilegu skoti upp í markvinkilinn fjær. Hann innsiglaði sigurinn svo endanlega með þriðja marki KR sem kom í uppbótartíma.

KR mætir belgíska liðinu Standard Liege í annarri umferð forkeppninnar.