Kannski vont fyrir meðalmanneskju

Anna Garðarsdóttir reiknar ekki með að geta spilað með liði sínu á ný fyrr en á seinni hluta tímabilsins í Pepsi-deild kvenna.

Anna var nýbúin að ná sér góðri af bakmeiðslum sem höfðu hrjáð hana í allan vetur þegar hún fékk botnlangakast í síðustu viku. Hún náði aðeins að spila í nokkrar mínútur með Selfossi í fyrstu umferð mótsins áður en það dundi yfir.

„Þetta gengur eins og í sögu - ég er að verða eins og ný,“ sagði hún í léttum tón þegar að Vísir heyrði í henni í morgun. Hún kvartaði ekki mikið undan því hvort upplifunin hafi verið sársaukafull.

„Kannski fyrir meðalmanneskju,“ segir hún og hlær. „En jú, þetta var frekar óþægilegt.“

Fyrstu vikuna eftir aðgerð var hún „ónýt“ eins og hún segir sjálf. „En ég er öll að koma til. Ég ætla þó ekki að setja neina pressu á mig og stefni að því að koma til baka á seinni hluta tímabilsins.“

„Úthaldið er ekkert hjá mér og ég get varla gengið upp stiga. Ég verð móð við það eitt að tala í símann.“

Hún segir það svekkjandi að geta ekki hjálpað liðsfélögum sínum í Selfossi en hún gekk til liðs við félagið í haust.

„Þau hafa verið góð við mig og þetta er frábær klúbbur. Ég vildi þvó ólm gera allt sem ég get fyrir þau. Svo get ég ekki gert neitt,“ segir hún.

Anna segir að bakmeiðslin hafi verið að hrjá hana síðan í október. „Ég náði tveimur æfingum áður og leið mjög vel í bakinu. En þá gerðist þetta. Ég hef greinilega gert eitthvað af mér í síðasta lífi.“

„Það var búið að grínast með það í vetur að ég yrði bara „waterboy“ á hliðarlínunni í sumar og nú er það að verða að veruleika. Ég mun bara sjá um brúsana,“ bætti hún við.

Selfoss hefur farið vel af stað í Pepsi-deild kvenna og liðið var ósigrað eftir þrjár umferðir. Liðið er nú með sjö stig eftir fjóra leiki í fjórða sæti.

„Þetta var óskabyrjun og virkilega mikilvæg stig sem við fengum. Það er mikilvægt fyrir svona ungt lið að byrja vel og þessar stelpur stóðu sig mjög vel.“

„Við höldum bara áfram og tökum einn leik fyrir í einu.“