Dansarar og kylfingur hljóta styrk

Sex íþróttamenn fengu 180 þúsund krónur í styrk þegar veitt var úr afreksmannasjóði Ungmennasambands Borgarfjarðar á dögunum. Skessuhorn greinir frá þessu.

Styrkþegar að þessu sinni voru þau Benjamín Karl Styrmisson, Birgitta Björnsdóttir, Daði Freyr Guðjónsson, Ármann Hagalín Jónsson og Erna Dögg Pálsdóttir, allir dansarar hjá Dansíþróttafélagi Borgarfjarðar og Bjarki Pétursson, kylfingur úr Golfklúbbi Borgarness.

Afreksmannasjóður UMSB var stofnaður á sambandsþingi 2008 og er tilgangur sjóðsins að styrkja afreksfólk, einstaklinga eða hópa innan UMSB sem náð hafa framúrskarandi árangri í íþrótt sinni.