Milan sektað vegna hegðunar stuðningsmanna

Stuðningsmenn AC Milan urðu sér til skamamr um helgina er þeir gerðu grín að Javier Zanetti, fyrirliða Inter. Þeir skemmtu sér konunglega á leiknum gegn Catania þar sem Zanetti hafði meiðst illa.

Zanetti sleit hásin og þessi mikli heiðursmaður verður frá í marga mánuði. Hann ætlar ekki að leggja skóna á hilluna þó svo hann sé orðinn 39 ára gamall.

Stuðningsmenn Milan sungu: "Hoppaðu með okkur Zanetti" og ítalska knattspyrnusambandið hafði lítinn húmor fyrir því.

Það sektaði Milan um rúma milljón fyrir þessa hegðun stuðningsmannanna en þeir voru einnig með stæla við laganna verði á leiknum.