Pinewood kvikmyndaverið haslar sér völl vestan hafs

Breska kvikmyndaverið Pinewood hefur tilkynnt um byggingu fyrsta hljóðvers síns í Bandaríkjunum. Kvikmyndaverið mun bera heitið Pinewood Atlanta en það verður byggt á stórri lóð fyrir sunnan borgina Atlanta í Georgíu.

Í frétt um málið á vefsíðu BBC segir að hljóðverið verði byggt í samvinnu við fjárfestingasjóðinn River´s Rock og að bygging þess hefjist strax.

Pinewood er þekktasta kvikmyndaver Bretlands og þar eru m.a. allar James Bond myndirnar framleiddar. Það hefur hinsvegar ekki rekið kvikmynda- eða hljóðver í Bandaríkjunum áður.

Fram kemur í fréttinni að ráðamenn í Georgíu hafa gert mikið í því að laða kvikmyndagerð frá Hollywood og til ríkisins með ýmsum fjárhagslegum ívilnunum. Frá árinu 2008 hafa framleiðendur kvikmynda og sjónvarpsþátta getað fengið 20% til 30% skattaafslátt í ríkinu ef þeir verja meir en hálfri milljón dollara innan Georgíu. Í boði er 10% afsláttur í viðbót ef þeir koma ríkismerki Georgíu fyrir í þáttum sínum eða kvikmyndum.

Þessi stefna hefur borið þann ávöxt að veltan í kvikmyndaiðnaðinum í Georgíu var yfir 3 milljarðar dollara í fyrra. Fyrir fimm árum var þessi velta aðeins 244 milljónir dollara á ári.