Hafa ekkert ráðið við Jarrid Frye

Grindavík og Stjarnan spila í kvöld fyrsta leik sinn í úrslitaeinvíginu um Íslandsmeistaratitilinn í Dominos-deild karla í körfubolta. Leikur kvöldsins fer fram í Röstinni í Grindavík, hefst klukkan 19.15 og verður í beinni útsendingu á Stöð 2 Sport.

Grindvíkingar réðu ekkert við Stjörnumanninn Jarrid Frye í tveimur leikjum liðanna á þessu ári.

Jarrid Frye var valinn besti leikmaður bikarúrslitaleiksins og var síðan aðeins einni stoðsendingu frá þrennu í deildarleik liðanna átta dögum síðar.

Frye er að skora 28,0 stig að meðaltali í leik í þessum tveimur viðureignum sínum á móti Grindavík og er með rétt tæplega 56 prósent skotnýtingu. Hvorugur þessara leikja var hinsvegar í Grindavík og nú er að sjá hvort Grindavíkurliðinu gangi betur með Frye í Röstinni.



Leikir Jarrid Frye á móti Grindavík:

91-79 sigur í bikarúrslitum

32 stig, 8 fráköst, 6 stoðsendingar, 65 prósent skotnýting - 37 í framlagi

104-82 sigur í deildinni

24 stig, 11 fráköst, 9 stoðsendingar, 47 prósent skotnýting - 31 í framlagi

Meðaltöl Frye á móti Grindavík:

28,0 stig

9,5 fráköst

7,5 stoðsendingar

55,9 prósent skotnýting

34,0 í framlagi