Javier Zanetti vill halda áfram að spila fram yfir fertugt

Argentínumaðurinn Javier Zanetti verður fertugur í ágúst en er þó ekki tilbúinn að leggja skóna á hilluna alveg strax. Zanetti hefur spilað með Internazionale frá árinu 1995.

Zanetti spilar vanalega sem bakvörður og getur spilað bæði hægra og vinstra megin. Hann getur líka spilað inn á miðjunni og er þekktur fyrir mikla yfirferð og vinnslu.

„Ég held að ég spili áfram eitt tímabil í viðbót," sagði Javier Zanetti í viðtali við Mediaset en það eru ekki margir sem geta spilað svo lengi í einni af sterkustu deildum heims.

Javier Zanetti er á sínu 18. tímabili með Internazionale en hann kom til félagsins frá argentínska liðinu Banfield árið 1995 eða þegar hann var nýorðinn 23 ára gamall. Zanetti lék sinn 600. deildarleik á Ítalíu á dögunum.

Zanetti hefur verið fyrirliði Internazionale í rúmlega þrettán ár en hann tók við fyrirliðabandinu í lok ágúst 1999.