Robben tryggði Bayern sæti í undanúrslitunum

Hollendingurinn Arjen Robben var hetja Bayern München í þýska bikarnum í kvöld þegar hann skoraði eina mark leiksins í 1-0 sigri á Borussia Dortmund í uppgjöri tveggja efstu liða þýsku deildarinnar í átta liða úrslitum bikarkeppninnar.

VfB Stuttgart vann 2-0 sigur á Bochum í hinum leik kvöldsins en í gær komust VfL Wolfsburg og SC Freiburg áfram í undanúrslitin.

Arjen Robben skoraði sigurmarkið sitt á 43. mínútu leiksins með frábæru skoti fyrir utan teig og Bayern-liðið er því enn á góðri leið í að vinna þrefalt í ár.

Borussia Dortmund vann tvöfalt í þýska boltanum í fyrra en er úr leik á báðum stöðum. Bayern er nefnilega með 17 stiga forskot á Dortmund í þýsku deildinni og á því þýska meistaratitilinn vísan.