Birkir skoraði gegn botnliðinu

Birkir Bjarnason skoraði þegar Pescara gerði 1-1 jafntefli gegn Palermo á útivelli í ítölsku úrvalsdeildinni í fótbolta í dag.

Birkir kom inn á sem varamaður á 66. mínútu og var búinn að skora sjö mínútum síðar. Annað mark Birkis í ítölsku A-deildinni.

Forysta Pescara dugði í sjö mínútur því Diego Fabbrini jafnaði metin á 80. mínútu og þar við sat.

Pescara var búið að tapa fjórum leikjum í röð fyrir leikinn og er í fallsæti. Liðið er með 21 stig í 18. sæti, stigi á eftir Genoa. Palermo er í neðsta sæti með 18 stig líkt og Siena.