Masters 2012: Fær kona loksins inngöngu í klúbbinn?

Öðru hverju hefur umræðan um skort á kvenfólki í Augusta National-klúbbnum skotið upp kollinum. Fyrir níu árum gerði Martha Burke, formaður Alþjóðasamtaka kvenna (NOW), alvarlegar athugasemdir við þá staðreynd að kona hefði aldrei verið tekin inn í klúbbinn. Hún boðaði til mótmæla og náði að vekja máls á umræðunni, án teljanlegs árangurs þó.

Í ár gæti þó farið að hitna undir kolunum í þessum efnum fyrir alvöru. Ástæðan er að nýr forstjóri hjá IBM, Virginia M. Rometty, er kona. Í áranna rás hefur forstjóra IBM-fyrirtækisins sjálfkrafa verið boðin aðild að Augusta-klúbbnum, en þeir hafa til þessa allir verið karlkyns. Það er líka ólíklegt að þessi regla verði felld niður, þar sem IBM er einn af þremur stærstu styrktaraðilum Meistaramótsins.

Sitjandi stjórnarformaður klúbbsins, Billy Payne, hefur enn ekki gefið frá sér yfirlýsingu um hver ákvörðun stjórnarinnar verður í þessu máli, en hefur lofað niðurstöðu að Meistaramótinu loknu. Payne sagðist ekki vilja skyggja á mótið sjálft með umræðunni.