Slitastjórnin að klára söluna á Aurum

Slitastjórn gamla Landsbankans er við það að ljúka við sölu á Aurum Holding. Samkvæmt heimildum Vísis hafa viðræður um söluna staðið yfir um skeið að undanförnu og tímaspursmál hvenær málin verði kláruð endanlega. Fyrirtækið sem slitastjórnin á í viðræðum við heitir Apollo og er eignarhaldsfélag sem á meðal annars nokkrar skartgripakeðjur.

Breska blaðið Telegraph fjallaði um söluferlið á Aurum á sunnudag fyrir viku. Þar kom fram að líklegt söluverðmæti fyrirtækisins er um 180 milljónir sterlingspunda, eða um 36 milljarðar króna. Sú upphæð samsvarar sexföldum rekstrarhagnaði fyrirtækisins í ár.

Aurum Holding rekur úra- og skartgripaverslanakeðjurnar Goldsmiths og Mappin & Webb. Fyrirtækið var upphaflega í eigu Baugs Group, en slitastjórn Landsbankans tók fyrirtækið yfir þegar Baugur fór í þrot.