Norðmenn og Þjóðverjar semja um nýjan sæstreng

Norðmenn og Þjóðverjar hafa komist að samkomulagi um lagningu nýs sæstrengs milli landanna. Talið er að lagning strengsins muni kosta allt að rúmlega 320 milljarða króna.

Það er norska fyrirtækið Statnet, sem raunar er í opinberri eigu, þýska orkufyrirtækið Tenne og þýski bankinn KfW sem komist hafa að samkomulagi um lagningu þessa sæstrengs sem og rekstur hans í framtíðinni.

Samkomulagið gerir ráð fyrir að sæstrengurinn, sem gæti flutt allt að 1.400 megawött, verði tilbúinn til notkunar árið 2018. Hann mun kosta á bilinu einn og hálfan til tvo milljarða evra eða allt að rúmlega 320 milljarða króna.

Á norskum vefsíðum má sjá að sæstrengur þessi á að liggja frá Flekkefjord í gegnum Sirdal og enda í Wilster í Slésvík-Holstein héraðinu.

Hugmyndin er að geta flutt sjálfbæra, eða græna orku, í báðar áttir með þessum sæstreng. Þannig gæti hann flutt vind- og sólarorku frá Þýskalandi þegar verið er að hlaða uppistöðulónin í Noregi yfir sumartímann. Á móti gæti hann flutt vatnsorku frá Noregi þegar sólin skín ekki í Þýskalandi og logn er ríkjandi þarlendis.