Vettel vann í fjórða sinn í röð

Heimsmeistarinn ungi, Sebastian Vettel, sem ekur fyrir Red Bull í Formúlu 1 leiddi indverska kappaksturinn af ráspól og til enda í dag. Hann hefur nú 13 stiga forskot á Fernando Alonso um heimsmeistaratitilinn.

Alonso ók Ferrari-bíl sínum í mark í öðru sæti á undan Mark Webber á hinum Red Bull-bílnum. Alonso gerði allt rétt í kappakstrinum en gat ekki gert atlögu að Vettel sem hafði komið sér upp góðu forskoti strax á fyrstu hringjunum.

McLaren-ökumennirnir Lewis Hamilton og Jenson Button náðu ekki að skáka Red Bull eins og þeir höfðu lofað fyrir mótið í Indlandi. Hamilton reyndi að komast fram úr Webber í síðustu hringjunum en gat ekki þó KERS-kerfið væri bilað í bíl Webber.

Hamilton lauk því mótinu í fjórða sæti á undan Felipe Massa á Ferrari. Kimi Raikkönen ók Lotus-bílnum í mark í sjötta sæti. Nico Hulkenberg á Force India lauk mótinu í áttunda sæti á undan Romain Grosjean hjá Lotus.

"Mér líkar brautin hér mjög vel," sagði Vettel þegar hann var spurður hvort hann hefði einfaldlega hannað brautina sjálfur fyrir sig. Enginn hefur leitt mótið í Indlandi annar en Sebastian Vettel í þau tvö skipti sem kappaksturinn hefur verið haldinn.

Martin Brundle benti Vettel þá á að hann hafi nú leitt fleiri hringi í röð í Formúlu 1 en Ayrton Senna gerði árið 1989. Gráti næst svaraði Vettel: "Það er geggjað. Við munum alltaf muna eftir Senna, ekki bara út af þessum metum heldur líka af því að hann var frábær manneskja."

Síðasta stigasætið tók Bruno Senna á Williams. Hann var yfirvegaður í kappakstrinum og kláraði dæmið vel, langt á undan liðsfélaga sínum Pastor Maldonado sem lauk mótinu í sextánda sæti og hring á eftir.

Mercedes-liðið vill að öllum líkindum gleyma þessari mótshelgi sem fyrst. Michael Schumacher ók utan í framvæng Jean-Eric Vergne í fyrstu beygju og sprengdi afturdekk. Schumacher lauk svo keppni snemma eftir að hafa brotið af sér í brautinni. Hann þarf að heimsækja dómarana nú eftir mótið. Nico Rosberg var í vandræðum líka og lauk mótinu aðeins í ellefta sæti.

Þrjú mót eru eftir af heimsmeistarakeppninni. Næst verður keppt í Abú Dhabi 4. nóvember.

Nr.	Ökuþór	Lið /Vél	Hringir	Tími
1	Sebastian Vettel	Red Bull/Renault	60	1:31'10.744
2	Fernando Alonso	Ferrari	60
3	Mark Webber	Red Bull/Renault	60
4	Lewis Hamilton	McLaren/Mercedes	60
5	Jenson Button	McLaren/Mercedes	60
6	Felipe Massa	Ferrari	60
7	Kimi Räikkönen	Lotus/Renault	60
8	Nico Hülkenberg	Force India/Mercedes	60
9	Romain Grosjean	Lotus/Renault	60
10	Bruno Senna	Williams/Renault	60
11	Nico Rosberg	Mercedes	60
12	Paul Di Resta	Force India/Mercedes	60
13	Daniel Ricciardo	Toro Rosso/Ferrari	60
14	Kamui Kobayashi	Sauber/Ferrari	60
15	Jean-Eric Vergne	Toro Rosso/Ferrari	59
16	Pastor Maldonado	Williams/Renault	59
17	Vitaly Petrov	Caterham/Renault	59
18	H.Kovalainen	Caterham/Renault	59
19	Charles Pic	Marussia/Cosworth	59
20	Timo Glock	Marussia/Cosworth	58
21	N.Karthikeyan	HRT/Cosworth	58
22	M.Schumacher	Mercedes	55