Annað árið í röð dregur lið sig úr keppni korteri fyrir mót | KA/Þór ekki með

Handknattleiksdeild KA hefur ákveðið að draga lið KA/Þórs úr efstu deild í kvennahandbolta og senda liðið í 2.deild/Utandeild í staðinn. Norðanmenn sendu frá sér yfirlýsingu í dag vegna málsins.

KA/Þór stóð sig vel í N1 deild kvenna í fyrra ekki síst eftir áramót og var að lokum aðeins einu stigi frá því að komast í úrslitakeppnina.

KA/Þór var eitt af tólf liðum í N1 deild kvenna í vetur en nú standa því 11 lið eftir og lenda stelpurnar því enn á ný í því að sitja hjá í tveimur umferðum.

Þetta er ennfremur annað árið í röð sem lið dregur sig úr keppni í N1-deild kvenna rétt fyrir mót en svo var líka raunin hjá Fylki í fyrrahaust. Fylkisliðið er hinsvegar með í ár og vonandi koma KA/Þór-stelpurnar líka sterkar inn á næsta ári.

Fylkisliðið missti marga lykilmenn fyrir tímabilið í fyrra og sömu sögu er að segja að liði KA/Þór og það er höfuðástæðan í báðum tilfellum að félögin draga liðin sín úr keppni.

Liðin sem skipa N1 deild kvenna í vetur eru því: Selfoss, Afturelding, FH, Fram, ÍBV, Grótta, Fylkir, Valur, HK, Stjarnan og Haukar. Selfoss, Afturelding og Fylkir voru ekki með í fyrra.



Yfirlýsing frá Handknattleiksdeild KA

Handknattleiksdeild KA hefur ákveðið að draga lið KA/Þórs úr efstu deild í kvennahandbolta og senda liðið í 2.deild/Utandeild í staðinn.

Ástæðan er sú að liðið hefur misst 5 reynslumestu leikmenn sína frá síðasta keppnistímabili, þar af tvo í þessari viku. Því telur stjórn Handkattleiksdeildar KA að yngri leikmönnum sé enginn greiði gerður með því að senda þær í efstu deild, en aðeins 2-3 stúlkur í hópnum hafa reynslu af því að leika þar.

Stefnan er sett á markvissar æfingar í vetur og keppni með það að markmiði að eiga aftur lið á meðal þeirra bestu á næsta hausti.