Stóru árnar í Djúpinu með 100 laxa hver

Veiðst hafa um það bil 100 laxar í Langadalsá, Laugardalsá og Hvannadalsá í sumar. Samtals er veiðin því um 300 laxar í þessum þremur ám í Ísafjarðardjúpi. Greint er frá þessu á vefnum bb.is.

Rætt er við Jóhann Torfa Ólafsson, hjá Lax-á, en hann segir að Langadalsá og Laugardalsá séu komnar yfir 100 laxa hvor en Hvannadalsá sé að nálgast 100 laxa markið. Á sama tíma í fyrra hafi veiðin í Langadalsá verið að nálgast 200 laxa og veiði Laugardalsá hafi einnig verið meiri í fyrra en nú. Aftur á móti sé veiðin í Hvannadalsá svipuð nú og í sama tíma í fyrra.

Jóhann Torfi bendir á að vegna veðurblíðunnar virðist sem laxagengd sé minni í langflestum ám á Íslandi í ár miðað við árin á undan.

„Það hafa samt komið góð skot í Langadals- og Laugardalsá þegar rignt hefur svo veðurblíðan hefur vissulega áhrif," er haft eftir Jóhanni Torfa á bb.is.

trausti@frettabladid.is