Gazzetta dello Sport greinir frá því að AC Milan hafi tekið kauptilboði Paris St-Germain í Zlatan Ibrahimovic og Thiago Silva. Vitnað er í Silvio Berlusconi, eiganda Mílanóliðsins.
„Já, ég hef selt Zlatan Ibrahimovic og Thiago Silva til PSG. Við munum spara 150 milljónir evra yfir tveggja ára tímabil," er haft eftir Berlusconi í Gazzetta dello Sport.
Ibrahimovic, sem var markakóngur Serie A á síðustu leiktíð með 28 mörk, er á samningi hjá AC Milan næstu þrjú árin. Skv. ítalska miðlinum hefur ekki verið gengið frá smáatriðum er varða samninginn en heildarkaupverð fyrir kappana er talið vera um 65 milljónir punda. Það nemur um 13 milljörðum íslenskra króna.
Séu heimildir ítalska miðilsins réttar bætast Zlatan og Silva í hóp með Argentínumanninum Ezequial Lavezzi sem gekk til liðs við PSG frá Napólí fyrir 24 milljónir punda (um 4,8 milljarða króna) á dögunum.
Zlatan og Silva á leið til PSG
