Katrín Ýr tryggði Selfyssingum stig

KR-ingar voru sekúndum frá því að landa sínum fyrsta sigri í Pepsi-deild kvenna er liðið fékk Selfoss í heimsókn í kvöld. Katrín Ýr Friðgeirsdóttir jafnaði metin fyrir gestina í viðbótartíma.

Selfoss var í næstneðsta sæti fyrir leikinn með sjö stig en KR í því neðsta með aðeins tvö. Anna Garðarsdóttir, sem hóf leikinn á bekknum, kom heimakonum yfir með marki á 50. mínútu. Vesturbæingar þurtu nauðsynlega á stigunum þremur að halda í slæmri stöðu á botninum en máttu sætta sig við eitt þar sem Katrín Ýr jafnaði í viðbótartíma sem fyrr segir.

Selfyssingar eru eftir leikinn með átta stig, jafnmörg og Afturelding í 8.-9. sæti en mun lakari markatölu. KR er áfram á botninum með þrjú stig.

Fyrr í kvöld jók Þór/KA forskot sitt á toppi deildarinnar með 2-1 sigri á Stjörnunni í Garðabæ.