Forsetakosningar 2012: RÚV ekki vanhæft

Samkvæmt niðurstöðu álitsgerðar þeirra Róbert Spanó, forseta lagadeildar Háskóla Íslands og Trausta Fannars Valssonar, lektors við lagadeild, telst Ríkisútvarpið ekki vanhæft til að fjalla um forsetakosningar 2012 - þó svo að Þóra Arnórsdóttir og eiginmaður hennar, Svavar Halldórsson, hafi starfað hjá stofnuninni um árabil og séu í launalausu leyfi.

Greint var frá þessu í fréttum RÚV. Í síðasta mánuði krafðist Herdís Þorgeirsdóttir þess að samstarfsmenn Þóru og Svavars kæmu ekki að þáttagerð vegna kosninganna.

Í álitsgerð Róberts og Trausta kemur fram að RÚV þurfi að tryggja að framsetning efnis sé óhlutdræg. Þá teljast nánir vinir frambjóðenda ekki óhlutdrægir, en að fólk hafi starfað saman leiði ekki til þess að fólk geti talist hlutdrægt.