Smálaxaganga hellti sér inn í Stekkinn í Norðurá

Hollið sem tók við af stjórn SVFR var komið með sex laxa eftir tvær fyrstu vaktirnar. Fyrsta holl landaði 25 löxum, og eftir hádegi í gær bættust við tveir laxar á milli fossa. Var þeim landað á Berghylsbroti og Kýrgróf. Samkvæmt frétt á heimasíðu SVFR fengust fjórir laxar í morgun.

Athygli vakti að undir hádegið gekk smálaxaganga inn í Stekkinn en því miður náðist ekki að landa þar nema einum laxi. Reyndar var hann 85 sentimetra en smálaxar voru á lofti samkvæmt veiðimönnum. Vart þarf að ítreka fyrir veiðimönnum hversu jákvætt það er að fá inn í árnar göngur af smálaxi svo snemma.

Norðurá hefur verið mjög köld síðustu vaktir, og sem dæmi var áin í tæpum sex gráðum í gærmorgun. Að sama skapi var lofthiti um frostmark með norðanbál í kaupbæti.

En það er meiri lax genginn í Norðurá heldur en á sama tíma undanfarin ár. Það verður því fróðlegt að stjá hvernig nýju holli reiðir af enda hefur hitastig hækkað nokkuð síðastliðinn sólarhring og veðurspá nokkuð hagstæð.

svavar@frettabladid.is