Gísli Marteinn: Þétting byggðar er ekki "innistæðulaus frasi“

Gísli Marteinn Baldursson, borgarfulltrúi Sjálfstæðisflokksins, segir að frekari þétting byggðar á höfuðborgarsvæðinu, einkum í Reykjavík, sé mikilvægt hagsmunamál fyrir Íslendinga alla og að hún sé ekki „innistæðulaus frasi" stjórnmálamanna. Þar horfir hann ekki síst til uppbyggingar íbúabyggðar í Skeifunni, sem sé rökrétt skref í átt að skynsamri uppbyggingu í Reykjavík.

Þetta er meðal þess sem Gísli Marteinn tjáir sig um í ítarlegu viðtali í viðtalsþættinum Klinkinu, sem aðgengilegur er á viðskiptavef Vísis.

Þá segir Gísli að borgarsamfélög séu sífellt að verða fyrirferðameiri í hinu pólitíska landslagi á alþjóðavísu, og að það sé ekkert öðruvísi með Reykjavíkurborg þó fámenn sé í samanburði við stórborgir heimsins. „Árið 2007 var árið sem fleiri íbúar bjuggu í borgum en dreifbýli í fyrsta skipti í sögunni. Í framtíðinni mun þessi þróun hafa mikil áhrif á stjórnmálin og fleiri samfélagslega þætti," segir Gísli Marteinn meðal annars í viðtalinu.

Sjá má ítarlegt viðtal við Gísla Martein, um skipulagsmál og borgarhagfræði, hér.