Fréttaskýring: Söguleg skráning FB á markað

Stefnt er að skráningu Facebook á markað 18. maí næstkomandi en samfélagsmiðillinn verður með einkennið FB á markaðsvaktinni í Bandaríkjunum. Skráningin er um margt söguleg en um er að ræða langsamlega umfangsmestu skráningu internetfyrirtækis í sögunni þegar horft er til markaðsvirðis við skráningu.

Stjórnendur Facebook, með forstjórann og stærsta eigandann Mark Zuckerberg fremstan í flokki, kynntu skráningarferlið fyrir fjárfestum fyrr í vikunni og kom þá fram að hlutir í félaginu verði verðlagðir á bilinu 28 til 35 dali á hlut en það þýðir að markaðsvirði félagsins er við skráningu áætlað 85 til 95 milljarðar dala, eða sem nemur ríflega þúsund til 1.200 milljörðum króna. Til samanburðar má nefna að hagnaður Facebook í fyrra var einn milljarður dala, og því er markaðsvirði fyrirtækisins áætlað 85 til 95 faldur árlegur hagnaður, sem mörgum finnst vera hátt verð.

900 milljónir notenda

Notendafjöldi Facebook er gríðarlegur á heimsvísu, eða ríflega 900 milljónir manna. Enginn samfélagsmiðill hefur náð nándar nærri eins mikilli útbreiðslu. Tekjur Facebook hafa vaxið hröðum skrefum og voru 4,2 milljarða dala í fyrra. Eins milljarðs dala hagnaður, af 4,2 milljarða tekjum, hefur sannfært fjárfesta um að rekstrarmódelið sé heilbrigt og miklir möguleikar séu á vexti.

Þeir felast fyrst og fremst í ótrúlegu magni markaðsupplýsinga og aðgangs að notendur Facebook, en auglýsendur geta með auðveldum hætti nálgast stóra hópa inn á Facebook sem erfitt hefur verið að nálgast beint til þessa. Facebook hefur ekki nýtt sér þessar leiðir til tekjuöflunar nema að litlu leyti, og því er almennt álitið að efnahagur fyrirtækisins muni vaxa hratt á næstu árum.

Google næst á eftir

Stærsta skráning netfyrirtækis til þessa er skráning Google árið 2003 en þá var markaðsvirði félagsins 24 milljarða dala. Facebook og Google, sem bæði byggja afkomu sína fyrst og fremst á auglýsingasölu, eru þegar orðnir harðir keppinautar, m.a. á farsímamarkaði.

Facebook keypti nýverið myndasamfélagsmiðilinn Instagram fyrir einn milljarða dala, en það var liður í því að stækka notendahóp Facebook í farsímum. Instagram getur tengst Facebook og hefur notendahópurinn ekki síst vaxið sökum þess. Tæplega 500 milljónir manna á heimsvísu nota Facebook einu sinni í mánuði.