Valencia sló Stoke úr leik

Valencia er komið áfram í 16-liða úrslit Evrópudeildar UEFA eftir 1-0 sigur á Stoke á Spáni í kvöld. Fyrri leiknum lauk einnig með 1-0 sigri Spánverjanna.

Jonas skoraði eina mark leiksins með skoti af stuttu færi eftir laglegan undirbúning Pablo Hernandez.

Stoke fékk sín færi í leiknum en Vicente Guaita, markvörður Valencia, varði til að mynda vel frá Kenwyne Jones tvívegis í leiknum.

Stoke var aðeins með fjóra leikmenn á bekknum í kvöld og Tony Pulis, stjóri liðsins, var með heldur veikan hóp í höndunum. Liðið komst þó ágætlega frá verkefninu.

Valencia mætir PSV Eindhoven í 16-liða úrslitum keppninnar.