Forstjóri Pimco gefur lítið fyrir áætlun Grikkja

Mohamed El-Erian forstjóri Pimco stærsta skuldabréfasjóðs heimsins og einn af helstu þungaviktarmönnunum í alþjóðlegum fjármálum gefur lítið fyrir samkomulagið sem grísku stjórnarflokkarnar lögðu fyrir fund fjármálaráðherra evrusvæðisins í gærkvöldi.

El-Erian segir að miklar líkur séu á að þetta samkomulag endi eins og fyrirrennari sinn, það er verði að engu innan tveggja mánaða. Þar á El-Erian við áætlunina sem samþykkt var þegar Grikkir fengu fyrra neyðarlán sitt frá Alþjóðagjaldeyrirsjóðnum og Evrópusambandinu. Ekkert af þeirri áætlun komst í gagnið.

El-Erian segir að vandi Grikkja sé einkum innbyrðisátök milli þingmanna og stjórnarliða sem og hið gríska samfélag í heild þar sem enginn vilji í raun bera ábyrgð.

Eins og fram hefur komið höfnuðu fjármálaráðherrar evruríkjanna þeirri áætlun sem grísku stjórnarflokkarnir komu sér saman um til þess að fá nýtt 130 milljarða evra neyðarlán. Ráðherrarnir settu Grikkjum strangari kröfur sem þeir verða að uppfylla fyrir miðvikudaginn kemur.