Aftur efasemdir um mótið í Barein - Ecclestone alveg sama

Vaxandi pressa hefur verið á skipuleggjendur Formúlu 1 mótaraðarinnar um að aflýsa kappakstrinum í Barein í ár. Mótinu var frestað í fyrra og síðar aflýst vegna mikilla mótmæla og mannréttindabrota af hálfu hins opinbera þar í landi.

Í ár eru uppi efasemdir eins og í fyrra um hvort mótið eigi að fara fram í Barein. Í fyrra bættist þó mikið óvissuástand vegna óeirða og hótana mótmælenda um að nota kappaksturinn þar til að láta rödd sína heyrast enn betur.

Nú hefur efri deild breska þingsins blandað sér í umræðuna og hvetur ráðamenn Formúlu 1 til að aflýsa mótinu á meðan pólitísk óvissa er í landinu. Bendir þingmaður breska gæningjaflokksins meðal annars á dagleg mótmæli og dauða enn fleiri borgara.

Bernie Ecclestone, sem stundum hefur verið kallaður alráður í Formúlu 1, vill hins vegar ekki hlusta á þá sem ekki vilja keppa í Barein enda gríðarlegir fjármunir fólgnir í mótum í Mið-Austurlöndum.

Niðurstaða framkvæmdastjórnar Formúlunnar í fyrra kom aðeins stuttu áður en mótið átti að fara fram. Þá höfðu liðstjórar og ökumenn komið fram og lýst yfir andstöðu sinni við að mótið færi fram. Líklegt er að sama verði upp á teningnum að þessu sinni.

Áætlað er að mótið í Barein fari fram þann 22. apríl og verði fjórða mótið á tímabilinu.