Sjóræningjar leggja á ráðin í leikhúsinu

Það var gott andrúmsloftið í Borgarleikhúsinu í gær þegar fyrsti samlestur á Gulleyjunni fór fram. Verkið er samstarfsverkefni Borgarleikhússins og Leikfélags Akureyrar en leikritið verður sýnt á Akureyri í janúar og kemur svo fyrir sjónir höfuðborgabúa haustið 2012.

Aðalleikarinn Björn Jörundur Friðbjörnsson var að sjálfsögðu mættur en hann leikur sjóræningjann fræga Langa Jón Silfur sem og meðleikarar hans Þóra Karítas Árnadóttir, Þórunn Erna Clausen, Einar Aðalsteinsson og Kjartan Guðjónsson.

Gulleyjan er ein frægasta sjóræningjasaga allra tíma og fjallar um Langa Jón Silfur og ævintýri hans. Sigurður Sigurjónsson leikstýrir verkinu en hann gerði einnig leikgerðina ásamt Karli Ágúst Úlfssyni. Þorvaldur Bjarni Þorvaldsson sér um tónlistina en verið er að leggja lokahönd á upptökur á tónlistinni í verkinu.