Saturdays-stúlka fékk lungnabólgu á Íslandi

Söngferill Frankie Sandford, sem er einn meðlima stúlknasveitarinnar The Saturdays, gæti verið í hættu vegna lungnabólgu sem hefur haldið henni frá störfum að undanförnu.

Breskir fjölmiðlar gera því skóna að Sandford hafi nælt sér í lungnabólguna hér á Íslandi, en eins og Fréttablaðið greindi frá kom sveitin hingað fyrir skömmu og tók upp myndband við Kleifarvatn. Aftakaveður lék hins vegar stúlkurnar grátt og neyddust þær til að vera ansi fáklæddar í köldum haustlægðum sem þá gengu yfir suðvesturhorn landsins. Myndbandið við My Heart Takes Over hefur notið ágætra vinsælda á YouTube og hafa tæplega 800 þúsund séð það. Áhugasamir geta þar séð hversu kuldalegt var um að litast.

Samkvæmt breska tímaritinu Heat er Sandford sögð hafa verið með kvef þegar hún kom til landsins en ástand hennar versnaði til muna eftir ferðalagið hingað. Sandford var lögð inn á sjúkrahús skömmu eftir heimkomuna og óttast það mjög að ferill hennar sé í hættu. „Hún er svo hrædd því hún hefur aldrei verið svona veik áður.

Hún grætur undan verkjum og óttast að ævintýrið sé úti.“ Þessar fréttir fengust hins vegar ekki staðfestar af talsmanni sveitarinnar né fjölmiðlafulltrúa Sandford en kærasti hennar, knattspyrnukappinn Wayne Bridge, hefur verið duglegur að hjúkra henni. - fgg