ÍBV og KR kannski frestað: Aftakaveðri spáð í Eyjum

Svo gæti farið að fresta yrði stórleik ÍBV og KR í Pepsi-deildinni á morgun.

Spáð er aftakaveðri í Eyjum og vindhraðinn gæti farið allt upp í 25 metra á sama tíma og leikurinn á að fara fram.

Birkir Sveinsson, mótastjóri KSÍ, sagði að menn þar á bæ væru ekki farnir að huga að frestun. Tekið yrði á málinu á leikdegi ef á þyrfti að halda.

KR-ingar hyggjast fljúga í leikinn á sunnudag og miðað við spána núna er ólíklegt að flogið verði til Eyja. Þá verður leiknum sjálfkrafa frestað fram á mánudag en spáin fyrir mánudag er ágæt.

Ef KR-liðið kemst aftur á móti til Eyja verður það síðan í höndum dómarans að ákveða hvort leikurinn fari fram eður ei.

Þriðja síðasta umferð Pepsi-deildarinnar á að fara fram á morgun. Klukkan 17.00 mætast Grindavík og FH, Fylkir og Stjarnan, Breiðablik og Víkingur, Valur og Þór og vonandi fer fram leikurinn í Eyjum. Leikur Fram og Keflavíkur hefst aftur á móti klukkan 19.15 í Laugardalnum.