Nú verður kátt í höllinni

Það ríkir mikil gleði við dönsku hirðina eftir að tilkynnt var um að Marie prinsessa væri barnshafandi. Hún og maðurinn hennar, Jóakim prins, eiga von á barni í janúar og verður prinsinn því brátt fjögurra barna faðir. Marie og Jóakim eiga fyrir hinn tveggja ára gamla Henrik en Jóakim eignaðist tvö börn með prinsessunni Alexöndru. Spákona heldur því fram að hjónin eigi von á strák.

Ekki verður annað sagt en að danska hirðin fjölgi sér ört því Friðrik krónprins og eiginkona hans, Mary Donaldson, eignuðust fyrr á þessu ári tvíbura og áttu fyrir tvö börn. Margrét Þórhildur Danadrottninng mun því vart hafa undan að kaupa gjafir handa öllum átta barnabörnunum sínum.