Stórvirki Jónasar slær bók Dr. Gunna út af borðinu

„Ég var farinn að búast við þessum málalokum,“ segir tónlistar- og neytendafrömuðurinn Dr. Gunni.

Ákveðið hefur verið að fresta útgáfu bókar hans, sem bar vinnuheitið Stuð stuð stuð – Íslenskt popp og rokk 1950-2010, fram á næsta ár. Ástæðan er sú að útgefandinn, Tómas Hermannsson hjá Sögum útgáfu, hefur eytt miklum tíma í nýja bók Jónasar Kristjánssonar, Þúsund og ein þjóðleið, á kostnað bókar Dr. Gunna. Bók Jónasar, fyrrverandi ritstjóra DV, fjallar um reið- og gönguslóðir og segir hann að tuttugu ára vinna liggi að baki henni.

„Ég veit að Tómas hefur lagt mikinn metnað í þessa bók mína. Þetta verður þyngsta bók ársins, fjögur kíló. Hún verður feiknarlega stór um sig,“ segir Jónas. Aðspurður segist hann hafa miklar mætur á Dr. Gunna en vill annars lítið tjá sig um frestun tónlistarbókar hans. „Ég hef unnið með honum og hann er hinn besti höfundur bóka og greina af ýmsu tagi. Bloggið hans er fínt og neytendamálaframtakið hans mjög gott.“

Gunni segist sjálfur vera búinn að skrifa handrit Stuð-bókarinnar. Tíminn sé aftur á móti ekki nægur til að ljúka við myndvinnslu bókarinnar og fleiri mál í tæka tíð fyrir jólabókaflóðið. „Það má segja að hann [Tómas] hafi spennt bogann of hátt. Hann var útkeyrður og uppgefinn þegar átti að keyra á bókina mína. Í staðinn fyrir að vera í geðveikri törn í einhverjar vikur sem myndi skila sér í fullt af villum og klúðri ætlum við að geyma hana fram á næsta ár.“

Að sögn Gunna mun bókin breytast og nýjum kafla verður bætt við hana. „Ég er að hugsa um að hafa þetta 100 ár og fara aftur til 1910 þegar fyrsta platan var gefin út,“ segir hann og notar tækifærið til að óska eftir fleiri myndum í bókina frá poppurum og öðrum tónlistaráhugamönnum. „Í staðinn fyrir að þetta verði frábær bók verður þetta geðveikislega frábær bók,“ segir hann og er hvergi af baki dottinn.

freyr@frettabladid.is