Er orðinn eftirsóttur hjá norrænum röppurum

Rapparinn Erpur Eyvindarson, eða Blazroca, hefur unnið mikið með norrænum röppurum upp á síðkastið. Stutt er síðan hann tók upp nýtt lag með Kaptein På Skuta frá Þrándheimi.

„Hann er mjög skemmtilegur. Hann er pólitískur og töff,“ segir Erpur. „Ég var að taka þennan íslenska status út frá konseptinu í því lagi, um það hvernig kúkalabbarnir á Íslandi eru að drulla í sig.“

Kaptein På Skuta hefur verið duglegur að gefa út lög í gegnum tíðina í samstarfi við aðra rappara en óvíst er hvenær lagið með Erpi kemur út. Hann fékk taktinn sendan frá Noregi í gegnum netið og rappaði síðan sjálfur ofan í hann með aðstoð upptökustjórans Gula drekans sem vann einnig með Erpi í laginu Elskum þessar mellur.

Erpur vann á sínum tíma með norrænum röppurum í tengslum við hljómsveitina Hæstu hendina og þar áður á fyrstu Rottweiler-plötunni. Að undanförnu hefur hann rappað inn á lög með ýmsum aðilum en mest frá Noregi, Finnlandi og Svíþjóð.

Vinsælasta hiphop-tímarit Norðurlanda, Kingsize, tók viðtal við hann og svo virðist sem Erpur sé orðið frekar þekkt nafn í norræna rappheiminum.

„Það er gaman af því að allt í einu er þetta lið að fylgjast með manni. Ég hef ekkert verið í þessu: „að reyna að meika það í útlöndum-rúnki“ og það er fyndið að þetta gerist svona sjálfkrafa,“ segir Erpur, sem hefur fengið boð um að spila í Noregi, Svíþjóð og í Danmörku í sumar.

„Það er rosalega gaman að spila fyrir nýtt fólk. Maður getur alveg farið á Hofsós og tekið góða tónleika en það er líka gaman að heyra ný hljóð og ný sánd, tékka á senunni og vinna með erlendu liði.“

Rapparinn hefur einnig í nógu að snúast hér heima í sumar. Hann er nýbúinn að klára sumarfríið sitt og núna fer allt á fullt. „Þetta verður rosalega gott sumar og það verður gaman að fylgja plötunni eftir,“ segir hann og á þar við sólóplötuna Kópacabana sem hefur selst í um fjögur þúsund eintökum.

„Það er stórkostlegt miðað við hvað er að gerast í tónlistarbransanum, sérstaklega hjá þeim hópi sem er að hlusta á rapp.“

Blazrocka kemur svo við sögu á væntanlegri plötu rapparans Emmsjé Gauta í laginu Hemmi Gunn. Þrátt fyrir nafnið fjallar það ekki beint um útvarpsmanninn hressa.

„Það fjallar meira um hvernig hann rúllar. Þetta er frekar í hans anda og fjallar um það að vera með „mad swag“ (flotta útgeislun).“

freyr@frettabladid.is