Litirnir gripu athyglina

Dísir boutique er ný vefverslun sem selur endurnýtanlegar töskur frá Envirosax. Fyrirtækið var stofnað árið 2010 til að bjóða upp á vörur sem taka tillit til umhverfisins, eru einstakar og fjölnota.

„Þetta ævintýri hófst með því að ég og dóttir mín vorum á vörusýningu í Kaupmannahöfn og sáum þessar töskur þar," segir Þórey Þórisdóttir, eigandi vefverslunarinnar Dísir.is.

„Það voru litirnir á töskunum sem fönguðu athygli okkar og þegar við komumst að því hver sagan á bak við þær var hugsuðum við okkur ekki tvisvar um. Þetta er einstaklega falleg hönnun og litirnir lífga svo sannarlega upp á umhverfið."

„Hugmyndasmiðir og eigendur Envirosax eru Belinda og Mark David-Tooze, sem hafa tileinkað sér þann lífsstíl að lifa lífrænu, sjálfbæru og kolefnalausu lífi í uppsveitum Ástralíu og reka fyrirtækið sitt þaðan. Þau hafa tileinkað sér þá viðskiptastefnu að draga úr mengun og endurnýta og endurvinna plast svo dæmi sé tekið," segir Þórey.

Auk tasknanna frá Envirosax selur hún fylgihluti fyrir konur á öllum aldri, hálsmen frá ýmsum hönnuðum, til dæmis úr silfri og leðri, og hálsklúta frá sænska fyrirtækinu Maja.

„Við reynum að halda sömu stefnu varðandi fylgihlutina," segir Þórey, „en það er erfitt að komast hjá því að plast og önnur ólífræn efni séu notuð í þeim. Klútarnir hins vegar eru úr bómull og hör og hundrað prósent náttúrulegir."

Þórey segir viðtökurnar hafa verið mjög góðar og nýlega hóf hún samstarf við verslunina Fígúru á Skólavörðustíg þar sem hún selur töskurnar. „Já, við leigjum þar smápláss," segir Þórey.

„Ætlum svona að sjá til hvernig það gengur. Draumurinn er svo að opna sjálf verslun í framtíðinni en við tökum þetta bara eitt skref í einu."

fridrikab@frettabladid.is