Óskar Bjarni: Þeir voru að stjórna leiknum mun betur

„Við höfum oft lent í þeim í þessum ham og þá náð þeim," sagði Óskar Bjarni Óskarsson, þjálfari Vals, eftir að liðið tapaði með tíu marka mun fyrir FH í Kaplakrikanum í kvöld.

„Það var ágætt að vera bara fjórum mörkum undir í hálfleik. Ég var alveg rólegur með það, við þurftum bara að laga hlaupin aftur og fá fleiri menn í gang sóknarlega. Þeir voru bara alltaf skrefinu framar."

„Það voru mjög margir sem áttu fínan leik hjá þeim og voru bara að stjórna leiknum betur. Þeir fundu meiri lausnir á okkar varnarleik en við á þeirra."

Óskar hrósaði Daníeli Andréssyni sem kom í markið hjá FH og varði mjög vel. „Við gerðum of mörg mistök í sókninni og markvörðurinn sem kom inn hjá þeim snéri leiknum á góðum punkti," sagði Óskar.

„Við þurfum að laga ýmsa hluti. Við vissum alltaf að þetta yrði erfitt. Svona er þetta bara."