Gæsaveiðin góð síðustu daga

Gæsaveiðin í Landeyjunum hefur verið mjög góð síðustu daga og flestir sem við höfum haft samband við gert ágætis veiði.  Menn hafa verið að fá 10-60 fugla í morgunfluginu og það virðist ekki vanta gæsina þetta árið frekar enn í fyrra.

Ein af bestu veiðijörðum landsins ef ekki í Evrópu hvað gæsina varðar er Ármót í Landeyjunum og veiðin þar hefur verið með allbesta móti í haust.  Þúsundir fugla hafa verið þar í ökrunum í haust og það sér ekki högg á vatni þó svo að það hafi verið skotnar nokkur hundruð gæsir þar í haust, enda akrarnir nokkuð víðfemdir og nóg æti fyrir fuglinn í korni sem er búið að fella.  Frekari upplýsingar um veiðina í Ármóti má finna á www.hunt.is

Þar eins og víðar hefur þó verið mikið af álft.  Hafliði Halldórsson á Ármóti sagið að fyrir fáum dögum hefðu verið meira en þúsund álftir við akrana, en hann og hans fólk verið duglegir að koma henni í burtu jafnharðann og hún sest niður.

Það má reikna með að það verði skotið langt fram í nóvember því stór stofn af gæs virðist vera farin að halda vetursetu á landinu svo lengi sem veturinn er ekki mjög harður.