Affallið í um 500 löxum

Veiðin í Affallinu hefur verið ágæt í sumar þó hún sé ekkert í líkingu við 2010 þegar áin var í 1000 löxum.  Áin er að ná 500 löxum sem feykilega góð veiði á fjórar stangir og af því eru um 70 stórlaxar.

Mikið af laxi hefur veiðst á milli staða og t.d. er veiðistaður á milli 14 og 15  sem hefur gefið 70 laxa undanfarna daga, en sá staður er ómerktur.  Stefnt er að því að merkja ánna upp aftur á næsta ári ásamt því að nákvæmt kort verður tilbúið fyrir veiðimenn á sama tíma.

Glæsilegt hús er við ánna fyrir veiðimenn og var það tekið í notkun í sumar, en það á ennþá eftir að klára það að utan en aðstaðan innandyra er til fyrirmyndar.  Nú þegar eru bókanir langt á veg komnar fyrir næsta ár og margir af þeim sem hafa veitt Affallið farnir að tryggja sér sína föstu daga jafnvel 2-3 ár fram í tímann.  Áin er nett, skemmtileg og frábær fluguveiðiá.

Veiðimenn sem luku veiði í gær lönduðu 3 löxum í fyrradagsmorgun og misstu nokkra, þar af einn sem datt af við háfun og var hann ekki undir 20 pundum.  Lax sást víða í ánni en hann var styggur og erfiður viðureignar því það var glampandi sól og logn þar eystra í gær.