AEK vann 1-0 sigur á Dinamo Tbilisi

Eiður Smári Guðjohnsen var í byrjunarliði gríska liðsins AEK frá Aþenu sem vann 1-0 sigur á Dinamo Tbilisi í forkeppni Evrópudeildar UEFA í kvöld.

Jose Carlos skoraði markið á 87. mínútu en Eiður Smári hafði verið tekinn af velli sex mínútum áður. Elfar Freyr Helgason var ekki í leikmannahópi AKE í kvöld.

Cala skoraði reyndar öðru sinni fyrir AEK á uppbótartíma en var dæmdur rangstæður.

Þetta var fyrri viðureign liðanna í forkeppninni en liðin mætast í Georgíu í næstu viku. Þá ræðst hvort liðið kemst áfram í riðlakeppnina.

Dinamo Tbilisi sló KR úr leik í síðustu umferð forkeppninnar.