1.715 laxar komnir úr Norðurá

Mjög góð veiði hefur verið í Norðurá í Borgarfirði síðari hluta júlímánaðar og hafa hollin verið að fá 100-150 laxa á þremur dögum. Enn er lax að ganga.

Samkvæmt upplýsingum frá Jóni G. Baldvinssyni þá hefur verið mikil ganga upp dalinn í rigningunni undanfarið. Í fyrrinótt fóru til að mynda 200 laxar upp um nóttina, og 450 laxar þrjár næturnar á undan.  Fór áin í 17 rúmmetra í vatnsviðrinu um hlelgina sem ætti að tryggja henni fínt vatn inn í ágústmánuð.  Ef öll svæði eru talin með er áin í 1.715 löxum á hádegi í dag.

Enn eru góðar göngur af nýjum laxi í Norðurá sem er nokkuð óvenjulegt um Verslunarmannahelgi.

Birt með góðfúslegu leyfi SVFR