Sigurbjörn: Vorum enn í fríi í upphafi leiks

Reynsluboltinn hjá Val, Sigurbjörn Hreiðarsson, var alls ekki nógu ánægður með sitt lið í kvöld sem tapaði 2-3 gegn ÍBV á heimavelli í Valitor-bikarnum.

"Við bara byrjuðum ekki leikinn. Við vorum enn í fríi og fengum á okkur þrjú mörk," sagði Sigurbjörn svekktur.

"Við sýndum samt karakter og komum til baka. Við fengum síðan færin til þess að jafna. Við ætluðum að mæta til leiks eins og menn en þeir voru bara miklu grimmari en við. Við vorum of langt frá þeim og alls ekki nógu grimmir.

"Þeir fengu að snúa með boltann og búa til færi sem þeir heldur betur nýttu í botn. Það var samt svekkjandi að ná ekki að jafna en það er kannski ekki hægt að ætlast til þess að við jöfnum leik eftir að hafa lent 3-0 undir.

"Við erum samt með fínt lið og ef menn gera þetta almennilega er alltaf líklegt að við skorum. Þetta er svekkjandi enda ætluðum við okkur alltaf áfram í þessum bikar."