Haraldur: Fylgjumst vel með leiknum á morgun

Haraldur Freyr Guðmundsson, fyrirliði Keflavíkur, á von á erfiðum leik í fjórðungsúrslitum Valitors-bikarkeppni karla, hvort sem andstæðingurinn verður KR eða FH.

Dregið var í hádeginu í dag en enn er tveimur leikjum ólokið í 16-liða úrslitunum. Keflavík fær útileik gegn annað hvort KR eða FH, sem mætast annað kvöld.

„Við fáum að fylgjast með KR og FH í sjónvarpinu og getum byrjað að undirbúa okkur eftir þann leik,“ sagði Haraldur við Vísi í dag. „Við vitum að við fáum erfiðan leik annað hvort í vesturbænum eða Kaplakrika en munum mæta brattir í þá.“

„Við teljum okkur vera með gott lið, hvort sem er fyrir deild eða bikar, og förum fullir sjálfstrausts í leikinn.“