Frábær sigur hjá Þór/KA gegn Breiðablik í markaleik

Þór/KA gerði góða ferð í Kópavoginn í dag og náði í þrjú stig með 4-2 sigri á Blikum. Akureyringar voru marki undir þegar hálftími lifði leiks en gáfust ekki upp. Stelpurnar að norðan skoruðu þrjú mörk á tæpum fimmtán mínútum og tryggðu sér sigur í opnum og skemmtilegum leik.

Fyrri hálfleikur var nokkuð jafn en stelpurnar frá Akureyri nýttu sér töluverðan vind í bakið og voru sterkari framan af. Þær pressuðu Blikastelpurnar hátt uppi á vellinum og voru duglegar að láta vaða á markið þegar þær komust í námunda við vítateig Blika. Fremst í flokki var Rakel Hönnudóttir sem lét boltasækjarana fyrir aftan markið vinna fyrir kaupinu sínu.

Hálfleikurinn var fjörugur og færi á báða bóga. Fyrsta mark leiksins kom á 17. mínútu. Þá komst Sandra María Jenssen leikmaður Þórs/KA í góða skotstöðu eftir baráttu í teignum og sendi boltann þéttingsfast neðst í markhornið. Óverjandi fyrir Bryndísi Láru Hrafnkelsdóttur í marki Blika.

Liðin skiptust á að sækja en það voru Norðankonur sem fengu betri færi. Fyrst átti Sandra María hörkuskot með vinstri fæti í þverslá og á 34. mínútu átti Mateja Zver skot í stöng. Í millitíðinni fengu Fanndís Friðriksdóttir og Gréta Mjöll Samúelsdóttir prýðisfæri sem ekki nýttust.

Á 38. mínútu jöfnuðu Blikar metin. Gréta Mjöll sendi fyrir á Fanndísi sem tók boltann snyrtilega með sér inn fyrir vörnina og lagði hann yfir Berglindi í marki Þórs/KA. Snyrtilegt mark og allt í járnum.

Það sem eftir lifði leiks skiptu liðin á að sækja en staðan í hálfleik 1-1.

Blikastelpur komu sterkari til leiksí síðari hálfleik. Þórdís Hrönn komst í gott færi eftir fallegt samspil Grétu Mjallar og Fanndísar en Akureyringar náðu að bjarga á síðustu stundu.

Á 55. mínútu leiksins náðu Blikakonur forystunni. Aftur var það Gréta Mjöll sem átti fallega sendingu inn fyrir á Fanndísi sem setti boltann í nærhornið. Berglind var þó ekki fjarri því að verja. Skömmu síðar komst Fanndís aftur í ágætis skotfæri en skotið framhjá.

Á 62. mínútu átti Manya Makoski frábæra sendingu inn fyrir á Mateju Zver. Bryndís Lára kom út á móti og varði vel. Boltinn hrökk út á völlinn til Mateju sem sendi hann í fyrsta, með vinstri fæti í boga í markið. Virkilega vel gert hjá Makoski.

Á tveimur mínútum í síðari hálfleiknum gerðu Norðankonur út um leikinn. Á 73. mínútu fékk Þór/KA aukaspyrnu út við hliðarlínu. Mateja Zver, Slóveninn í liði Norðankvenna sendi þá háann bolta að marki Blika sem Bryndís Lára sló boltann upp í slánna og inn. Klaufalegt hjá Bryndísi í markinu og vont átti eftir að versna hjá Blikum.

Rúmri mínútu síðar fékk Manya Makoski boltann ein inn fyrir vörnina gegn Bryndísi sem kom út á móti. Makoski urðu á engin mistök og lagði knöttinn snyrtilega framhjá Bryndísi í markinu. Staðan orðin 4-2 og útlitið gott fyrir Þór/KA.

Það sem eftir lifði leiks gerðist fátt markvert og Akureyringar lönduðu stigunum þremur sem virtist fjarlægur draumur þegar hálftími lifði leiks.

Viðtöl við leikmenn koma inn síðar í kvöld.