Veiði

Annar risavaxinn urriði úr Þingvallavatni

Karl Lúðvíksson skrifar
Tommi með urriðan úr Þingvallavatni
Tommi í Veiðiportinu fékk draumafiskinn í Þingvallavatni fyrir skömmu. Var um að ræða 23 punda risaurriða samkvæmt frétt frá Veiðikortinu.

Á vef Veiðikortsins er frásögn af viðureigninni við urriðann stóra. Þar segir m.a: Tommi setti undir flugu sem heitir Páskaunginn og var með sökklínu og 12 punda taum.  Í þriðja kasti var rifið í fluguna og hann var á en bara í skamma stund og fiskurinn slapp.  Tveim köstum síðar var hann aftur á nú var hann fastur.  Fiskurinn rauk út með línuna einhverja 80 m og einhvern veginn náði línan að festast í grjóti og nú var allt fast!Nú voru góð ráð dýr, enda Tommi ekki einu sinni í vöðlum.   Hann kallaði á Örn veiðifélaga sinn eftir aðstoð og hélt hann á stönginni meðan Tommi klæddi sig í vöðlur, því það átti að gera tilraun til að losa línuna úr grjótinu.  Þar sem það er mjög aðdjúpt þar sem þeir voru dugðu vöðlurnar ekki og þá varð að treysta á sundtökin og lét hann sig hafa það að taka nokkur sundtök  út og það hafðist að losa línuna.  Það var kraftaverki líkast að fiskurinn var ennþá á og Tommi náði að landa þessum risaurriða rennblautur upp fyrir haus!

Fiskurinn var hængur og var 97 cm að lengd og ummálið um 57cm og vó hann 23 pund!

Fiskurinn er kominn í uppstoppun og munu aðdáendur risaurriðans geta skoðað gripinn þegar hann verður klár í Veiðiportinu, Grandagarði, en þar verður hann hengdur upp á vegg.

Veiðivísir óskar honum til hamingju með fiskinn

Stangveiði

Mest lesið




×

Mest lesið