Öskufall leikur veiðimenn grátt fyrir austan

Það leit vel út með veiði fyrir þá sem hófu veiðar í Steinsmýrarvötnum á hádegi laugardags. Aðstæður áttu hins vegar eftir að breytast eins og gefur að skilja!

Jón Guðmundsson og félagar áttu hollið um helgina og meiningin var að ljúka veiðum á hádegi í dag. Það fór hins vegar á annan veg, og sluppu þeir í bæinn um miðjan dag í gær er hlé varð á mesta öskufallinu.

Líkt og sjá má á meðfylgjandi mynd, þá var ástandið orðið vægast skelfilegt. Um klukkan sex í gærmorgun var orðið svartamyrkur. Sagði hann það hafa bjargað miklu að ekki var mikill vindur, en þó blés ösku inn í veiðihúsið í gegnum minnstu glufur.

Næstu dagar eru óseldir í vötnunum þannig að ekki þarf að hafa áhyggjur af veiðimönnum í öskufokinu.

Birt með góðfúslegu leyfi SVFR