Engar afbókanir erlendra veiðimanna

Þrátt fyrir að Ísland sé í öllum miðlum heimsins út af eldgosinu í Grímsvötnum virðast þeir erlendu veiðimenn sem hér eiga veiðileyfi í sumar pollrólegir yfir ástandinu.  Upplýsingagjöfin í kringum þetta gos er mikið betri og skilvirkari þar sem reynslan af gosinu í Eyjafjallajökli er klárlega að skila sér.  Menn eru meðvitaðir um að gosið stendur líklega yfir í stuttann tíma og eru því ekki að hugsa um að afbóka ferðir sínar til Íslands.

Veiðivísir hafði samband við stærstu veiðileyfasala landsins, Lax-á og SVFR, og eru starfsmenn þeirra almennt sammála um að erlendir veiðimenn séu mikið rólegri núna en í fyrra.  Engar afbókanir en auðvitað með hliðsjón af fréttaflutningi síðustu tvo daga er mikið af fyrirspurnum.

Samkvæmt því sem jarðfræðingar segja þá búast þeir ekki við löngu gjóskugosi því þegar kvikan er kominn í gegnum vatnið í Grímsvötnum, tekur hraun að flæða og öskufallið ætti að vera úr sögunni, nema þá á jöklinum sjálfum.