Tommy Nielsen verður með FH á móti Blikum

Tommy Nielsen er búinn að ná sér af meiðslunum sem hafa hrjáð hann að undanförnu og verður hann því með FH-liðinu þegar þeir fá Íslandsmeistara Breiðabliks í heimsókn á sunnudaginn. Þetta kemur fram í frétt á Stuðningsmannasíðu FH-inga.

Tommy missti nú þriðja árið í röð af fyrsta leik FH á mótinu þegar FH-liðið tapaði 0-1 á móti Valsmönnum á mánudagskvöldið. FH-liðið hefur ekki náð að vinna neinn af þessum opnunarleikjum sínum án Danans.

Tommy var að glíma við hnémeiðsli en fékk síðan væna tognun aftan í læri. Hann verður 39 ára gamall í næsta mánuði og hefur spilað 137 leiki fyrir FH síðan að kom til liðsins árið 2003. Síðan að Tommy kom í Krikann hafa FH-ingar endað annað hvort í 1. eða 2. sæti á Íslandsmótinu.

Guðmundur Sævarsson mun hinsvegar missa af Blikaleiknum vegna smá tognunar aftan í læri og þá er Alen Sutej farinn að hreyfa sig aðeins aftur en FH-ingar gera ekki ráð fyrir honum fyrr en eftir hléið á Íslandsmótinu vegna EM U-21.