Daði: Boltinn fór einfaldlega ekki inn

Reynsluboltinn Daði Guðmundsson var í liði Framara sem sigraði Þór síðast þegar liðin mættust í efstu deild sumarið 2002. Daði var á skotskónum í þeim leik en gleymdi líkt og félagar sínir að reima á sig skotskóna í dag.

„Við héldum boltanum líklega 80 prósent af leiknum. Fengum sextán horn, óteljandi krossa, nokkrar aukaspyrnur fyrir utan teig úr góðum færum en boltinn fór einfaldlega ekki inn. Það var það sem vantaði."

Framarar náðu oft að koma sér í ákjósanlegar stöður en aldrei var réttur maður á réttum stað. Daði sagði markvörð þeirra Srdjan Rajkovic hafa virkað óöruggur.

„Þegar við náðum að setja pressu á markvörðinn sást að hann var óöruggur en það vantaði bara betri hlaup á nærstöngina. Við vorum of seinir þegar boltinn kom fyrir."