Álverðið er komið yfir 2.600 dollara á tonnið

Ekkert lát er á verðhækkunum á áli á markaðinum í London. Er verðið nú komið í 2.612 dollara á tonnið miðað við þriggja mánaða framvirka samninga. Hefur verðið ekki verið hærra síðan sumarið 2008.

Heimsmarkaðsverð á áli hefur rokið upp undanfarna daga í takt við hækkanir á olíu og annarri hrávöru.

Um mánaðarmótin janúar/febrúar stóð verðið í tæpum 2.400 dollurum fyrir tonnið.

Ástandið í Líbýu og öðrum Arabalöndum er höfuðástæðan fyrir miklum verðhækkunum á hrávörum eins og olíu, áli og kopar undanfarna daga.

Þá spilar einnig inn í að dollarinn hefur veikst töluvert gagnvart evrunni frá áramótum eða hátt í 3%.