Ekkert virðist stöðva Dortmund

Borussia Dortmund heldur áfram sínu striki í þýsku úrvalsdeildinni og virðast ekki ætla að láta frá sér efsta sætið, en þeir unnu þægilegan sigur á FC St.Pauli 2-0 í dag.

Gylfi Þór Sigurðsson, leikmaður Hoffenheim, byrjaði á varamannabekknum í dag þegar lið hans mætti Köln í þýsku úrvalsdeildinni. Það hefur verið hlutskipti Gylfa að byrja á bekknum undanfarið þrátt fyrir virkilega góða frammistöðu.

Staðan var 0-0 í hálfleik en Hoffenheim náði að komast yfir eftir þriggja mínútna leik í síðari hálfleik þegar Milivoje Novaković, leikmaður Köln, skoraði sjálfsmark. Köln náði að jafna leikinn á 65. mínútu en þar var að verki Youssef Mohamad. Leiknum lauk með 1-1 jafntefli.

Gylfi Þór Sigurðsson fékk aðeins að spreyt sig í nokkrar mínútur en hann kom inn á þegar 90 mínútur voru liðnar af leiknum.

Eyjólfur Sverrisson, nýráðin aðstoðarþjálfari Wolfsburg, var í fyrsta skipti á hliðarlínunni í dag þegar lið hans tapaði ,2-1, fyrir Freiburg í þýsku úrvalsdeildinni.

Efsta liðið í deildinni Borussia Dortmund fékk St. Pauli í heimsókn en Dortmund leikur heimaleiki sína á einum erfiðasta heimavelli í Evrópu, en troðfullt er ávallt á Signal Iduna Park sem tekur um 80 þúsund manns. Lucas Barrios skoraði fyrra mark Dortmund en Ralph Gunesch skoraði síðan sjálfsmark. Borussio Dortmund sigraði leikinn 2-0 og eru enn lang efstir í þýsku úrvalsdeildinni.

Úrslit dagsins í þýsku úrvalsdeildinni:

Hamburger SV - Werder Bremen - 4:0

SC Freiburg - Wolfsburg -2:1

Hoffenheim - FC Köln - 1:1

Hannover - FC Kaiserslautern - 3 :0

Borussia Dortmund - FC St.Pauli - 2:0